പാടം മുഴുവന്‍ കുഴിക്കുന്നു ഏമാന്‍മാര്‍ ഉറക്കം നടിക്കുന്നു.
കുറച്ച് ദിവസമായി ഏറെ വിവാദമാകുന്ന വാര്‍ത്തകളും പടങ്ങളുമായി പത്രമുഖങ്ങളില്‍ നിറയുന്നത് കുറെ പാടമുഖങ്ങള്‍ മാത്രം. മണ്ണ് കോരിയും വാരിയും മൊത്തം നികത്തിയും കുറച്ചുപേര്‍ മുതലാളിമാരും ലക്ഷപ്രഭുക്കളുമായി മാറി . കര്‍ഷകനാകട്ടെ പാട്ടത്തിനെടുത്തും സഹകരണ ബാങ്കുകളില്‍ നിന്ന് വായ്പയെടുത്തും കൃഷി നടത്തിയിരുന്ന പാടമായിരുന്നു. ഭൂമിയെന്ന മണ്ണ് അമ്മയെന്നൊക്കെ പഴമക്കാര്‍ പറഞ്ഞത് മാത്രം കൈമുതലാക്കി കൃഷിക്കിറങ്ങി മുടിഞ്ഞു. ആത്മഹത്യകളുടെ എണ്ണം കൂടുമ്പോഴെല്ലാം മുതലാളിമാരും ഈ ലക്ഷപ്രഭുക്കളും സന്തോഷവാന്‍മാരാണ് കാരണം ഇനി കൃഷിയെന്ന് പറഞ്ഞ് ആരും പാട്ടത്തിന് പാടം ചോദിക്കില്ലല്ലോ? അപ്പോള്‍ മണ്ണുമാന്തികള്‍ പ്രവര്‍ത്തിച്ച് തുടങ്ങും പാടം നികത്തുഭൂമിയാവും ആ മണ്ണ് ഫ്ലാറ്റുകാരുടേതുമാവും. എന്നാല്‍ സ്വന്തം കുഴിമാടത്തിന് കൂട്ടിരിക്കുന്ന ഈ പ്രവൃത്തി കുടിവെള്ള മെന്ന മഹാമേരുവിന്റെ കടക്കല്‍ കത്തിവെക്കുന്നതാണെന്ന് തിരിച്ചറിയുമ്പോഴേക്ക് അനുഭവിക്കാന്‍ യോഗമില്ലാത്തവര്‍ എന്ന നിലയിലേക്കാവും കാര്യങ്ങള്‍. നാട്ടിന്‍ പുറങ്ങള്‍ അടുക്കിവെക്കപ്പെട്ട കോണ്‍ക്രീറ്റ് പെട്ടികളാവാന്‍ എണ്ണപ്പെട്ട ദിവസങ്ങളാകുമ്പോള്‍ പാടവും തണ്ണീര്‍ത്തടങ്ങളും അകാലചരമം പ്രാപിച്ചിരിക്കുമെന്ന് തീര്‍ച്ച.
No comments:
Post a Comment